عِـشْقٌ سَرْمَـدِيٌّ -هُـوَيْـدَا-الهلال”معيون” فلوران غايب شِدْوا الركايب

استراليا عشق البلد

-سكلبة الاهلى المصرى “عيوطه” واى الحكم موريتانى ..انتوا ما عارفين التحكيم الموريتانى نحرنا عديل فى الكلاسيكو “اللخير”

-تعازى المريخابى الجميل”الامين احمد”للقبيلة الزرقاء فى درة شندى” عبدالمحمود”..مروان شلبى تعال بى جاى

–نهبت المليارات  احذروها (شيخة إيلاف أم جوان “من شندى. الفيس باسم أم أحمد الرقم0129852165)

☾ يا إلهي لو خلقت في كلّ جزء من أعضائي ألسنا ناطقة بافصح اللّغات ومعاني رائقة فائقة عن حدود الإشارات وحمدتك وشكرتك في الدّهور والاحقاب لعجزت عن التعبير عن مدى عشقى السرمدى للمعشوق الهلال(اى والله)..هلال امدر والله ما بنطال..عاشقاك يا اعز هلال ..ورسمك والجناس غير تام..مع اسم الجلالة الله..(الله-الهلال)..عاشقاك لو لا مخافة الله ..لعبدتك ..عاشقاك يا هلال امدر و صنوك  هلا مدريد ,,اسياد يا ملوك ملوك الريد كيه للعزال..الله يا هلال الكون ..درنا المكنون..عاشقاك يا اعز هلال..قلبى البى هواك ممكون..إنساك المحال سلواك..عاشقاك منذ نفخ الروح ..الروح كيف تفارق الروح..يشهد ربنا السواك عاشاقك.

☾اللهم كف عن الملكى الهلال شر العَوارِضِ..(فلوران مالو ما جا)..وأيه اسباب غيابك افصح عن أسبابك.تبقت 15 يوما حسوما..على معترك ذهاب الابطال ..سيخوض الملك الهلال اول تجاربه الاعداديه الثلاثاء القادم..(لى يومى ويومكم )وما زال المدرب فلوران غائبا عن معسكر  تونس(اى والله)..عقب فترة الراحه الاولانية غاب عن اللحاق بالاقمار فى موريتانيا مدرب اللياقه التونسى ردحا من الزمان ..وهاهو ذا المدرب فلوران غائب حتى الآن عن معسكر الاقمار..ولم يفتح الله على المجلس الافصاح عن عذر تغيبه..فى  الاوقات الحرجه هذى..لو ان هنالك ظروفا اسرية قاهرة من حقنا ان نعلم بها ..وايا كانت الاسباب وراء غيابه ..يقود المعسكر المعلم خالد بخيت هل سيشرف على مباراة الثلاثاء ام سيظهر فلوران قبلها.؟ ..(باكر فيها المناكر يا خالد) اعقلها وتوكل وخلى مخزون ابداعاتك يتفجر ..فى التشكيلة والتكتيك..واكان ابدعت واجدعت فلوران( بنشيلها بنشيلها)..حاجه اخيره..و تونس تلعب عصرا(ياربى فى رمضان بلعبوا صايمين .؟..ليت مباراتى الزعيم الهلال اقيمتا ليلا فى ذات توقيت مباراة القاهرة 

☾ الشمال غلب المريخ 1 – 2..الترتيب نواذيبو 40نقطة من 20مباراة وعنده  مباراة مؤجلة مع الملكى الهلال “بنغلبو”..الشمال 39نقطة من 22مباراة..الزعيم الهلال 37نقطه من 17مباراة(خمسه وخميسه عين الحسود فيها بارود)..الجمارك 36نقطه من 21مباراة..المريخ 35نقطة من 22مباراة.

☾سكلبة ” عيوطه” و الجوطه بتكتر  (واى اى ما دايرين الحكم موريتانى والهلال فى الدورى الموريتانى

الساعه 9 بالليل موعدنا فى استاد القاهرة (بغيتنا) مطلع ابريل “يوم واحد” ..الكاف قال حكم الساحه..الموريتاني “دحان بيدا” .. المساعد الأول: جيرسون إيمليانو (أنجولا).المساعد الثاني: إيفانيلدو (أنجولا).الحكم الرابع: عبدالعزيز بوه (موريتانيا).حكم تقنية الفيديو: ليتيسيا فيانا (إسواتيني-من مملكة إسواتيني وتعرف سابقًا باسم مملكة سوازيلاند ).مساعد حكم فيديو: ديانا تشيكوتيشا (زامبيا)..كلف الحكم الجابونى “بيير أتشو ” بادارة مباراة الرد ..وطاقمه المعاون من الجابون ما عدا ..المساعد الأول: سورو فاتسواني (ليسوتو)وحكم تقنية الفيديو: ماريا ريفيت (موريتانيا).مساعد حكم فيديو: كارين أتزامبونج فومو (الكاميرون)..سمعنا تحت تحت قالوا الاهلى منسحب ..معرد تانى تحت ذريعة الحكم موريتانى والملكى لاعب فى الدورى الموريتانى ..هيت لك..الزعيم الهلال سودانى والمشاركة الموريتانية فرضتها ظروف الحرب القهرية ..والتحكيم الموريتانى نحرنا نحر..فى الكلاسيكو “اللخير”

☾فى بريد العشاق

تعازى  المريخابى النبيل الاستاذ( الامين احمد):”رحم الله اللاعب ” عبدالمحمود” (درة شندى) تقبله الله قبولا حسنا وجعل الجنة مستقره ومقامه..العزاء للقبيلةالهلالية وكل مجتمع الرياضيين..وعبركم لقدامى لاعبي الهلال..انا لله وانا اليه راجعون”

☾  الفقد واحد اخى  المريخابى  الامين احمد”ان شاء الله “ما نواجبكم ” فى الشينة..ليت بنو جلدتك “الحمر” يعلمون اننا اخوة فى الله

واخص منهم بالذكر “مروان شلبى” القاعد لى فوق العزيزه ظنيته ساكن فوق حيطتى اللت الفيس كل شويه يجينى متلب..حالفه افرض عليهو رسوم اقامة وعبور ..بالدينار الكويتى كمان عشان اطلع زيتو ..هل تدرى يا “مروان” ان  هنالك مريخاب كثر يداومون على التهام “عيمودى”..نان ما  بحبو الضلع والاكل المجيه المسبك الثمح ..اشهد الله يحرصون على مناولتهم العيمود طازج من فوق حيطة الواتساب من سنيين  حفظهم الله..وزماااان يا مروان سنة حفروا البحر فوق تسعينيات القرن الماضى كتب الزميل الكاتب المريخى ” اسماعيل حسن “فوق عيموده بصحيفة السودان الحديث :” هويدا الماحى مريخابيه بعقلها وهلالابيه بقلبها..وقامت الدنيا وما قعدت” 

☾ شيخه ايلاف نصابه فاحذروها .. فضحتها كذبة ..تتواصل فى قروبات الواتس ..فقد تواصلت مع الجميع شخصية محتالة باسم” شيخة إيلاف محمدإبراهيم محمد أم جوان…وفي الفيس باسم أم أحمد من الرقم0129852165 قالت في حوجة ل50 مصحف لمركز دار الحافظين بشندي منطقة سلوة غرب خزان الطاقة الشمسية..وجمعت المليارات ..عند البحث عن عنوان المركز المزعوم..فُوجِئُوا بانه مغلق منذ زمن بعيد

☾اضحكوا يا هلالاب آخرها كوم تراب:” مسطول جنو كسر تلج!‐ الأستاذة قالت ليهو : قوم ارسم ليك رسمة!‐ قام رسم خيم جنبها ابل ! وبدو وراعي!
‐ الأستاذة قالت لي : يا سلام رسمتك حلوة شديد!‐ المسطول : اتكيف كيف شديد قام مسح الإبل!‐ الأستاذة قالت ليهو : ليه مسحتهم!‐ قال ليها : ديل ضبحناهم عشان خاطر عيونك يا عسل! 🤝🙂”

☾ نبض العشق السرمدى ..يكفى النيل أبونا والهلال سودانى.. انا يا غرامى وصلت بيك. فى الدنيا لى حد الغرام..اعشقك ولا أُبالي وَإنْ أُرِيقَتْ دمَائي ..فَدِمَاءُ العُشّـاقِ دَوْمـاً مُبَاحَهْ.. ويبقى العشق ما بقى سمو الهلال-زرقـاء الـعشق –هُـوَيْـدَا اَلْـمَـاحِى